SPD4459 Kwun Tong Creative Haunted House [必玩] 觀塘工廈創意鬼屋「香港之死」中文版

由於是次文章篇幅較長，英文版將會分開發佈
As the post is long, English version will post on other page
English Version

一年一度既萬聖節又到喇，無論你係大膽定細膽都可以為左應下節去下鬼屋架，去海狗公園同迪迪尼鬼屋玩到厭? 觀塘百厭星而家為你介紹不一樣既主題密屋解謎鬼屋「香港之死」。

「香港之死」鬼屋由PlayGround by Hide n" Seek創辦，位於工廠林立既觀塘開源道豐利中心

(題外話: 由於其他百厭星話好好好驚唔敢玩，所以今次得百厭星C孤身上路，真係好孤獨啊..嗚嗚嗚嗚...)

上到去豐利中心3樓，基本上一向左望就會望到佢地既易拉架，雖然冇門牌亦都冇招牌，但係都唔算話好難搵

因為之前已經經wtsapp預約左，所以去到既時侯只係講返電話就可以買飛喇

入場費學生價89蚊、成人價109蚊，相比出面鬼屋平

因為係星期六又係3點佢地岩岩開鋪既關係，入到去果時只係得3個女仔係前面等緊，鬼屋負責人話正常會預4-6人一組，由於未係好多人，百厭星C可以選擇同佢地一姐或者自己玩。百厭星C見佢地驚驚青青咁，最後決定都係弧身上路到底!!!

係等玩既同時，可以係等侯區睇下一啲關於鬼屋既細則同埋係四圍影下相先。

鬼屋既細則同一般既鬼屋大同小異，不過有樣唔同既野就係入面既鬼係唔會同你有任何身體接觸架~ (其實佢唔掂你驚嚇度已度大減一半:P)

入口既等候區既佈置一啲都唔馬虎架，入面幾暗而且佈置到好似一個靈堂咁，氣紛都幾好架
 

 我諗好多人都會問，點解鬼屋會叫「香港之死」既? 百厭星同大家一樣都有呢個疑問，於是就去問鬼屋負責人。

鬼屋負責人話鬼屋主題之所以會叫「香港之死」係因為佢想打造一間只係屬於香港人既鬼屋，鬼屋入面會以好似戲劇既型式咁進行，以一啲近年香港人會面對既種種問題加入鬼屋元素，希望玩家可以切身處地咁去了解問題所在、深入體驗香港情同埋香港事而更加有共鳴，鬼屋入面設有5個主題房間講述唔同既香港問題，玩家係每一間房都會有3分鐘時間解謎，成功通過每一間房都會得到一啲帛金，係最後就可以用呢D帛金買孟婆綿花糖再行過奈何橋，希望每一個玩完呢個鬼屋既人都會有反思同埋可以放低所有負能量咁話!

講講下前面既3個女仔已經開始入去玩喇!~

佢地入左去之後有陣陣既尖叫聲傳出黎，每組人入去既時候都會有個道士先生陪住你，負責人話等多大約6分鐘就會到我(聰明既你一定會知6分鐘代表啲咩啦!)

等多左一陣終於到我喇~

可愛既道士先生會先講解下香港到底係點死既同埋之後落黎既房間大約係點(即係上面負責人講既野)，再拜完同上一炷香俾香港之後就可以由靈堂既左面出發喇!

入左去房之後因為唔可以影相同錄影，所以由百厭星繼續口述落去啦~

主題房間包括有雙非床位，大學畢業即變負資產貧窮問題，自由行問題，結婚置業花盡金錢，年老退休獨居老人問題等等。

每一個房間都有3分鐘時間幫隻鬼解決一啲問題，解謎方法都係搵野搵野同搵野..變化唔算好大，最令百厭星印象深印既人一隻個名好可愛既鬼同埋一個反串既女鬼(因為太嬌俏....)，想知佢地係咩鬼，咁就一定要自己入去玩下喇!

係每間房既佈置方面，雖然因為成間鬼屋既總面積唔大，只係大約有2500呎，所以每一間房都唔算太大，不過房間既佈置唔錯，恐怖感唔輸出面大型既鬼屋，呢方面真係好抵讚啊!

因為鬼屋加入左戲劇既元素，有恐怖位之餘仲有啲搞笑位(雖然百厭星C係由頭笑到落尾，不過前面3個女仔都頻頻發出唔少尖叫聲)

係完成左5間房、拎完帛金同孟婆買完綿花糖再行過埋奈何橋之後，就會黎到最後一站影相區喇~

係影相區度有好多唔同既恐怖佈置俾大家影相

 係影相區度仲有好多唔同既道具俾我地用或者著黎影相既，呢D道具都係同岩岩玩過既房間有關架

  

另外影相區仲設有即影即有相機梳紙俾人用，價錢係20蚊一張

最後最後..佢地就會好似一般靈堂咁俾一封吉儀俾你，其實只係用黎找錢...(百厭星終於明點解佢地入場費係9蚊尾)..如果屋企比較迷信記得唔好帶個封套返屋企..唔係實俾阿媽鬧架!

玩完呢間「香港之死」鬼屋之後，百厭星C覺得係幾好玩既

因為以香港做主題既鬼屋幾特別之餘，由於再加入左戲劇同解謎既成份，令到鬼屋唔只係得個驚同睇字，娛樂性即刻加左唔少分。而且收貴唔算太貴，以一個大約30分鐘玩完又唔洗山長水遠去搭一輪車同俾幾百蚊入場費既鬼屋黎講，都算抵玩同玩得過，抄鬼抄馬既道士同鬼又入戲又好玩，呢個萬聖節唔知去邊好? 不防考慮一下觀塘既「香港之死」鬼屋啦~

由於工廠鬼屋位於室內，所以朝早同夜晚去唔會有太大分別，如果你唔想等太耐同清靜啲咁玩，不防選揀佢地岩岩開鋪既時間去。

最後~俾大家睇下百厭星C同紙公仔既自拍相啦~

後記:

雖然鬼屋對外公佈只係開放到10月31，不過負責人話由於有佔中活動，鬼屋將會考慮廷期開放到11月中。

想重溫由百厭星製作既觀塘百厭星 X「香港之死」Trailer 請按以下連結:
http://kwuntongnaughtyboy.blogspot.hk/2014/10/spd4459-x-playground-by-hide-n-seek_6.html

「香港之死」鬼屋

地址：觀塘開源道 54 號豐利中心 302 號館

開放時間：10 月逢星期五 7pm - 11pm、逢星期六及日 3pm - 11pm

收費︰學生每位 $89（6 人同行 1 人免費）、成人每位$109（8 人同行 1 人免費）

查詢︰5545 2991(可經wtsapp預約)

Facebook: http://www.facebook.com/playground.hs

以下為英文版之連結:

Below is the link of English version:
http://kwuntongnaughtyboy.blogspot.hk/2014/10/spd4459-kwun-tong-creative-haunted.html 

SPD4459 Internet Marketing and Public Relations

Entertainment in Kwun Tong District

Chinese Version Written by Carol
English Version Written by Vivian